Ты марыш стаць высакакласным інжынерам альбо зрабіць прарыў у 3D-мадэлізме? А ці ведаеш як? Лайфхакамі з табой падзеляцца зоркі WorldSkills.

Чым сёння займаюцца самыя перспектыўныя і працавітыя хлопцы і дзяўчаты нашай краіны? Падрыхтоўкай да паездкі ў Казань: з 22 па 27 жніўня там прой­дзе 45-ты Міжнародны чэмпіянат па прафесійнаму майстэрству WorldSkills Kazan 2019. Беларусь у Расіі будуць прадстаўляць 36 удзельнікаў у 33 кампетэнцыях. Каб больш даведацца аб гэтых спаборніцтвах і высветліць, як туды патрапіць, “ПВ” звярнуўся да ўдзельнікаў.

Адкрывае спіс зорак WorldSkills Уладзіслаў Дзерван. Хлопец надоечы скончыў машынабудаўнічы факультэт Беларускага нацыяналь­нага тэхнічнага ўніверсітэта па спе-цыяльнасці “тэх­налогія ма­шы­на­будаўніцтва”. Зараз працуе ў ААТ “Амкадор”, дзе займаецца праектаваннем тэхналагічнай аснасткі рэжучага інструмента.

—Уладзіслаў, у хуткім часе ты выправішся ў Казань. Што туды вязеш?

— Мая кампетэнцыя называецца “Інжынерны дызайн CAD” — гэта трохмернае цвёрдацельнае праектаванне, напрыклад, для машынабудавання ці прыборабудавання. Прасцей кажучы — 3D-мадэлі.

—Адкуль паўстала за­ці­каў­ленасць да гэтага напрамку?

— Распачалося ўсё на 3-м курсе вучобы ў БНТУ. Выкладчык-куратар курсавога праекта прапанаваў студэнтам, якія хочуць атрымаць высокую адзнаку, зрабіць 3D-мадэль рэдуктара. Ідэя мяне захапіла. Увечары, пасля заняткаў, я разгледзіў відэаролікі на YouTube. Потым пачаў разбірацца ў спецыяльнай праграме, працаваць. Так зацягнула, што скончыў займацца а сёмай гадзіне раніцы (смяецца). Нават пасля таго як абараніў курсавую работу, працягнуў цікавіцца 3D-мадэляваннем для сябе. Пра гэта даведаўся адзін з выкладчыкаў і параіў паспрабаваць сябе ў руху WorldSkills.

—Як праходзіць пад­рых­тоўка да міжнароднага чэмпіяната?

— Кожны дзень, пасля працы, акрамя выхадных, займаюся па 3–4 гадзіны ў спецыяльнай праграме — Autodesk Inventor, дзе мне неабходна перакласці гатовыя чарцяжы ў мадэлі, каб потым з іх зрабіць зборкі, а ўжо са зборак зноў чарцяжы, розныя схемы разборак…

—Чаму абраў менавіта ма­шынабудаўнічы факультэт БНТУ?

— Шмат знаёмых казалі, што ў мяне тэхнічны склад розуму. Да таго ж, у дзяцінстве любіў гуляць з канструктарам і рабіць розную тэхніку. Мой тата часта ўзгадвае, як за некалькі гадзін у мяне атрымлівалася сабраць то бензапілу, то вежавы кран, то яшчэ штосьці.

—Раскажы падрабязней, як трапіў у зборную Бе­ларусі?

— У лютым 2018-га праходзіў адбор на рэспубліканскі чэмпіянат, у якім я заняў першае месца. І ў мае ўжо браў удзел у рэспубліканскім чэмпіянаце WorldSkills Belarus, дзе за званне лепшага змагалася 10 чалавек. Я здолеў апынуцца на першым месцы. Гэта дазволіла мне паехаць у Абу-Дабі і абараняць гонар сваёй краіны ў Аб’яднаных Арабскіх Эміратах.

А ў сакавіку 2019-га адбыўся закрыты адбор на міжнародны чэмпіянат, які ў хуткім часе пройдзе ў Казані. Спаборніцтва праходзіла ў кожнай кампетэнцыі. Перамагчы мог любы з трох, але менавіта мне ўсміхнулася фартуна, таму з вялікай радасцю еду на чэмпіянат у Расію.

—Ці вартая перамога ўсіх тваіх намаганняў?

— Калі прызналі лепшым у першы раз, мяне перапаўняла шмат пачуццяў, нават кайфаваў ад гэтага. У другі — была менш бурная рэакцыя на поспех. Але, даведаўшыся, што буду прадстаўляць Беларусь у Расіі, адчуў вялікі гонар, таму што змог дасягнуць мэты.

—Ты зрабіў гэта сам? Ці хтосьці падтрымліваў?

— Заўсёды падбадзёрваюць бацькі і сябры. Яны рады, што я займаюся любімай справай і атрымліваю ад яе задавальненне.

—З якім настроем накі­роў­ваешся ў Казань?

— Адчуваю гордасць за сябе, краіну, універсітэт і сваю сям’ю.

—Што параіш тым, хто марыць дасягнуць поспеху ў інжынерыі?

— Чытаць неабходную літара­туру. Вучыць тое, што патрэбна для паступлення ва ўніверсітэце, а таксама падмацоўваць веды на практыцы.

Кропелька гісторыі

WorldSkills — міжнародны некамерцыйны рух, мэта якога — павышэнне статуса прафесійнай адукацыі, стандартаў прафесійнай падрыхтоўкі і папулярызацыя рабочых прафесій.  Існуе на працягу 70 год і з’яўляецца адным з самых маштабных конкурсаў прафесійнага майстэрства. Беларусь далучылася да міжнароднай арганізацыі WorldSkills International у 2014 годзе і ўжо ўзяла ўдзел у двух сусветных чэмпіянатах — у Сан-Паулу (Бразілія, 2015) і Абу-Дабі (ААЭ, 2017).

Міні-анкета Улада

• Любімы прадмет у школе: матэматыка.
• Любімы прадмет ва ўніверсітэце: інжынерная графіка і тэхналогія машынабудаўніцтва.
• Любімая настаўніца: пачатковых класаў Наталля Аляксееўна Паўлец.
• Любімы выкладчык ва ўніверсітэце: па тэхналогіі машынабудаўніцтва Юліян Юліянавіч Ярмак.
• Хобі: веласпорт.

З зоркай WorldSkills пазнаёмілася Настасся Капцава, «ПВ».

Поделиться ссылкой с друзьями:

Мои друзья: